Váilevaš diehtojuohkin buohcciviesu ja suohkana gaskka lea okta váldomoaitámušain riikkaviidosaš bearráigeahčus jagis 2015, mas ovttasdoaibma pasieanttaid olggosčáliheamis spesialistadearvvašvuođadoaimmahagas suohkaniidda guorahallojuvvui. Váilevuohta lei muhtin muddui dan vuogis mii geavahuvvui dieđuid sáddemii, muhto ledje maid váilevuođat sisdoalus, ovdamearkka dihte pasieantta dearvvašvuođadili, doaibmannávccaid árvvoštallama ja dálkkasdieđuid hárrái. Váilevuohta dahje váilevuođa várra dálkkaslisttuid hárrái lea namuhuvvon meastta buot geahččoraporttain.

Stáhta dearvvašvuođageahčču čoahkkáigeassá dán raporttas gávdnosiid geahčus man fylkkamánnit čađahedje. Geahču váldomodealla lei ahte fylkkamánnit čađahedje geahču ovtta dearvvašvuođadoaimmahagas ja guovtti suohkanis juohke fylkkas. Raporta lea ráhkaduvvon 56 geahččoraportta vuođul, 19 dearvvašvuođadoaimmahaga ja 37 suohkana dárkkisteamis.

Buot doaimmahagat ledje dahkan ovttasbargošiehtadusaid, ja buot šiehtadusain ledje njuolggadusat dasa mo ovttasbargu galgá leat pasieanttaid olggosčáliheami hárrái. Bearráigeahčus fuomášuvvojedje gustovaš njuolggadusaid rihkkumat sihke suohkaniid ja dearvvašvuođadoaimmahagaid bealis, ja fylkkamánnit čujuhedje máŋgga suohkanis ja doaimmahagas váilevaš čuovvoleami ja bearráigeahču jođiheddjiid bealis.

Fylkkamánnit gávdne láhkarihkkumiid 36 bearráigeahčus, ja 23 bearráigeahčus čujuhuvvojedje čielga buoridangáibádusat. Muhtin bearráigeahčuin gávdne fylkkamánnit sihke láhkarihkkumiid ja buoridangáibádusaid. 13 bearráigeahčus eai gávdnan fylkkamánnit dilálašvuođaid mat rihkkot dearvvašvuođalágaid.

Fylkkamánnit čuovvolit dearvvašvuođadoaimmahagaid ja suohkaniid main gávdne láhkarihkkumiid, dassážii go dilálašvuođat leat njulgejuvvon ja čuvvot eiseválddiid gáibádusaid.

Viecca raportta (pdf)
Sammendrag på norsk
Summary in English

Gå til toppen