Čoahkkáigeassu Dearvvašvuođageahču raporttas

Dearvvašvuođa- ja fuolahusdepartemeantta juolludanreivves 2022–2023 ožžo buot riikka stáhtahálddašeaddjit bargun viežžat máhtu movt gielddat váidagiid vuosttašinstánsan meannudit mearrádusváidagiid. Stáhta dearvvašvuođabearráigeahčči oaččui bargun ovttastahttit stáhtahálddašeddjiid máhttoviežžama. Dearvvašvuođabearráigeahčču lea čohkken ja systematiseren bohtosiid.

Máhttoviežžama ulbmilin lei fuomášit surggiid gos dárbbašuvvo buoridit gielddaid váiddameannudeami, mas lea mihttomearri nannet pasieanttaid ja geavaheddjiid riektesihkkarvuođa. 

Máhttoviežžan čađahuvvui kártemiin, mas gielddat ieža evaluerejedje iežaset jearahallanskovi bokte. 370 gielddain/gávpotosiin vástidedje oktiibuot 297 jearahallanskovi. Vástádusproseanta lea dalle 80.

Mii sáhttit geassit ovdan čuovvovaš váldofuomášumiid:

• Dainna eavttuin ahte lohkomateriálas váiddaoasi ja váiddaáššiid bohtosiid birra leat eahpesihkkarvuođat, oaidnit mii ahte váidagiid lohku lea vuollegaš mearrádusaid logu ektui. Váiddaáššiid oasi dáfus oaidnit mii muđui ahte eai leat stuorra erohusat fylkkaid gaskkas.
• Gielddain lea gosii 90 % main leat systemat obbalaččat doaimmahit váiddadieđuid.
• Gielddain lea badjelaš bealli main leat siskkáldas áigemearit váidagiid áššemeannudeapmái.
• Birrasiid 80 % meannuduvvon váidagiin lei áššemeannudanáigi vuollel golbma mánu.
• Muhtun gielddain ledje váidagat main lei áššemeannudanáigi guhkit go guhtta mánu. Sivat mat dávjá dieđihuvvojit guhkes leat ahte gielda vurddii čielggadeami fástadoaktáris dahje eará instánssain, ahte gielddas leat olu áššit, ja/dahje beare unnán resurssat/virggit várrejuvvon áššemeannudeapmái.
• Gielddain lea badjel 80 % main leat bargodábit dieđihit váidaga meannudanproseassa birra váidái.
• Badjel 90 % gielddain nevvot váidinvuoigatvuođaid birra.
• Badjel 80 % gielddain addet heivehuvvon dieđuid váidinvuoigatvuođaid birra rašis joavkkuide.
• Gielddain lea badjel 80 % main leat bargodábit veahkehit áššebeali go dárbbaša veahki váidimii.
• Gielddain lea sullii 2/3 main leat bargodábit njálmmálaš váidagiid vuostáiváldimii.
• Gielddain lea sullii 2/3 main leat bargodábit máná buoremusa árvvoštallamii váiddaáššiin mat njuolga dahje eahpenjuolga guoskkahit máná.

Go muhtin gielddain eai leat bajábealde namuhuvvon systemat ja/dahje bargodábit, de sáhttá dát čujuhit gielddaid váiddaáššiid meannudeami riskasurggiide.