Buoret álbmotdearvvašvuohta Riikkaviidosaš geahču čoahkkáigeassu 2014 – suohkaniid barguálbmotdearvvašvuođalága vuođul gozihit álbmogadearvvašvuođadilálašvuođaid ja mat dasa váikkuhit

Álbmotdearvvašvuođabargu suohkaniin galgá leat vuođustuvvon álbmoga duohta dearvvašvuođadilálašvuođaid ala ja daid positiiva ja negatiiva beliid ala mat sáhttet váikkuhit dearvvašvuođadilálašvuođaid. Dákkár bajilgovva galgá leat mielde suo­hkaniid plánaid ja doaimmaid čađaheamis ja nu leat vuođđun dasa ahte álbmotdearvvašvuođabargu šaddá ulbmillaš ja ávkkálaš.

Suohkaniid álbmotdearvvašvuođabarggu vuosttaš riikkaviidosaš geahčču čađahuvvui 2014 čavčča. Ulbmil geahčuin lei fuolahit ahte suohkanat mat eai lean álggahan guorahallamiid mat addet áigges áigái gova dilálašvuođain, bohtet johtui dainna, ja fuolahit ahte suohkanat mat ledje juo álggahan dán barggu, ain ovdánit dainna. Dán raporttas lea bohtosiid čoahkkáigeassu.

Fylkkamánnit čađahedje geahču 50 suohkanis ja gávnnahedje ahte 35 suohkana ledje boahtán johtui bargguin oažžut ollislaš gova álbmotdearvvašvuođas. Liikká ledje stuora erohusat das man muddui dat ledje ollen bargguin. Dat eará 15 suohkana eai lean álggahan barggu. Dáid suohkaniid jođiheaddjit eai lean ieža vuođđudan ja vuolggahan barggu, eai ge lean lágidan dilálašvuođaid dasa ahte bargu livččii sáht­tán doaimmahuvvot bálvalussurggiid rájiid rastá. Dat eai lean mearridan dan ge guđiid dilálašvuođaid sii dárbbašit gozihit.

Ahte guokte goalmmádasa suohkaniin leat álggahan barggu, atná Dearvvašvuođageahčču buorren boađusin. Fylkkamánniid rávvagat ja neavvagat sáhttet dahkat ahte suohkanat fuomášit mo sii sáhttet buoridit ja ovdánahttit barggu ain viidáseappot. Fylkkamánnit čuovvolit suohkaniid mat eai vuos lean álggahan bargguid ja čuvvot mielde dassá go dilálašvuođat leat njulgejuvvon.