Geahččočalmmiiguin čuovvut duođalaš ja vuordemeahttun dáhpáhusaid spesialistadearvvašvuođabálvalusas – Dearvvašvuođageahču Guorahallanovttadaga dieđáhus ja vásáhusat 2014

Duođalaš dáhpáhusaid duogábealde spesialistadearvvašvuođabálvalusas leat dearvvašvuođadoaimmahagat ja dearvvašvuođabargit geat dáhttot bargat nu buori barggu go vejolaš. Muhto buot deaŧalepmosat leat pasieanttat ja divššohasat mat máŋgga ovdamearkkas leat duođalaččat buohccit ja dárbbašit medisiinnalaš divššu. Máŋggabealat dikšundoaimmat ja latnjalas ja duođalaš buozanvuođat ja vahágat leat stuora riskan dasa ahte buozanvuohta sáhttá vearáskit ja ahte boasttuvuođat sáhttet geavvat.

2014:s bohte Stáhta dearvvašvuođagehččui 414 dieđiheami duođalaš dáhpáhusaid birra spesialistadearvvašvuođabálvalusas. Dán raportta vuođđun leat ovdamearkkat ja vásáhusat Guorahallanovttadaga ja dearvvašvuođageahčuid barggus dieđihanortnega čuovvoleamis, nu go dat lea ásahuvvon spesialistadearvvašvuođalágas § 3-3a. Mii lea maiddái bovden soames oapmahaččaid, dearvvašvuođadoaimmahagaid ja fylkkamánni minguin juogadit vásáhusaid ja árvvoštallamiid raporttas namuhuvvon oktasaš hástalusaid birra. Das leat maiddái logut ja dieđut dieđihemiin main oaidná mo dat leat juohkásat dearvvašvuođadoaimmahagaid mielde, makkár dáhpáhusat leat dieđihuvvon ja mo Guorahallanovttadat lea geahču dáfus čuovvolan dieđihemiid.

Ulbmil raporttain lea movttiidahttit dearvvašvuođadoaimmahagaid árvvoštallat ja digaštallat hástalusaid mat leat pasieantasihkarvuođa ja kvalitehtabuorideami hárrái spesialistadearvvašvuođadoaimmahagas. Gulahallan mii Guorahallanovttadagas lea dearvvašvuođadoaimmahagaiguin, dearvvašvuođabargiiguin ja pasieanttaiguin ja oapmahaččaiguin lea mielde dahkame ahte ortnet dađistaga ovdána ja rievdá.

Norgga dearvvašvuođalágain celkojuvvo ahte dat geat doaimmahit iešguđetlágan dearvvašvuođabálvalusaid galget atnit ovddasvástádusa das ahte pasieantadivššus lea sihkarvuohta ja kvalitehta. Dat mielddisbuktá maiddái ahte vurdojuvvo ahte jođiheaddjit systemáhtalaččat guorahallat dieđihemiid duođalaš dáhpáhusaid ja eará boasttuvuođaid ja váilevuođaid birra. Deaŧalaš beallin dearvvašvuođabálvalusa pasieantasihkarvuođa buorideamis leat jođiheaddjit mat iežaset doaimmahagain aktiivvalaččat ja ulbmillaččat barget ovddidit vuoiŋŋa mas rabasvuođain ja oadjeba¬sat sáhttá dieđihit go juoga manná boastut.

Buorre fágalaš geahčču, mas duođalaš dáhpáhusaid dieđiheapmi čuovvoluvvo bearráigeahččodoaimmaid bokte, galgá doarjut buohcciviesuid iežaset kvalitehtabu¬oridanbarggu ja váikkuhit dan guvlui ahte bálvalus jođihuvvo nu ahte pasieanttat áigges áigái ožžot dohkálaš dearvvašvuođaveahki.