Dieđiheamit eai iskojuvvo. Čoahkkáigeassu riikkaviidosaš geahčus 2015:s ja 2016:s: Mánáidsuodjalusa bargu dieđihemiid hárrái ja máhcahemiid/vástádusaid hárrái sidjiide geat leat dieđihan

Suohkanat galget jođihit ja dárkkistit iežaset mánáidsuodjalusbálvalusa nu ahte mánát geat dan dárbbašit, ožžot rievttes veahki rievttes áigái. Bargu dieđihemiid vuostáiváldimis ja daid árvvoštallamis galgá leat bealuštahtti ja dohkálaš. Seamma guoská máhcahemiide dieđiheaddjái iešguđetge dásiin. Mánát geat dárbbašit veahki galget fuomášuvvot.

Riikka fylkkamánnit leat čađahan bearráigeahču mánáidsuodjalusbálvalusain ja suohkanat leat ieža árvvoštallan iežaset mánáidsuodjalusbálvalusaid. Oktiibuot leat mii čoahkkáigeassán raporttaid 225 suohkanis ja gávpotosiin mat leat guorahallan kvalitehta ja buoridanmuni iežaset barggus dieđihemiid gieđahallamis.

Bearráigeahččoraporttat čájehit stuora váilevuođaid áššesuorggis. Mánáidsuodjalusbálvalus ii deavdán láhkagáibádusaid dasa movt dieđiheamit galget váldojuvvot vuostá ja árvvoštallojuvvot. Dieđiheamit mat fylkkamánniid árvvoštallama mielde eahpitkeahttá livčče galgan iskojuvvot, ledje biddjojuvvon eret iskkakeahttá. Muhtin mánát eai ožžon dárbbašlaš veahki ja fuolaheami rievttes áigái.

Sii geat dieđihit mánáidsuodjalussii vuorjašumi muhtin máná geažil, galget oažžut máhcaheami, namalassii vástádusa. Stuora oassi mánáidsuodjalusbálvalusain medde maiddái dan dáfus. Dat guoská máhcahemiide sihke priváhta ja almmolaš dieđiheddjiide. Skuvllat ja mánáidgárddit mat ledje sádden dieđáhusa eai nappo diehtán oažžu go mánná veahki vai ii.

Fylkkamánnit čuovvolit mánáidsuodjalusbálvalusaid main leat gávdnon váilevašvuođat dassážii go dilli lea njulgejuvvon. Stáhta dearvvašvuođageahčču ávžžuha riikka buot mánáidsuodjalusbálvalusaid guorahallat iežaset jođiheami ja doaimma dán raportta gávdnosiid hárrái.