Divššohas- ja oapmahašoaidninsadji duođalaš dáhpáhusain Ovdamearkkat ja vásáhusat Stáhta dearvvasvuođabearráigeahčču barggus oktan duođalaš dáhpáhusaid dieđihemiiguin jagis 2018

Divššohassii ja oapmahaččaide dat čuohcá garraseapmosit go dearvvasvuođa- ja fuollabálvalusas leat duođalaš dáhpáhusat. Stáhta dearvvasvuođabearráigeahčču deaivvada oapmahaččaiguin guđet dávjá leat vásihan bávččas massima ja guđet lea sakka guoskkahuvvon. Oapmahaččat dávistit dán iešguđet láhkai. Soapmásat leat suhttan ja heađásmuvvan dearvvasvuođabálvalusa ja fátmmastuvvon dearvvasvuođabargiid dáfus. Mii vásihat ahte sis dávjá leat guoskevaš ja buorit dieđut mat dievasmahttet dan ovdanbuktima maid dearvvasvuođabargit ja jođiheaddjit midjiide muitalit dáhpáhusmanu birra. Sii veahkehit min oažžut dievvaseamos gova das mii dáhpáhuvai, ja danne buori vuođu árvvoštallat ahte oaččui go divššohas hárálaš dearvvasvuođaveahki.

Doaimmas lea láhkaduvvon geatnegasvuohta, ja ovddasvástádus, dieđihit ja čuovvulit divššohasaid ja oapmahaččaid maŋŋil duođalaš dáhpáhusaid spesialistadearvvasvuođabálvalusas. Doaimmas lea maiddái geatnegasvuohta guorahallat dáhpáhusaid vai sáhtášii almmustahttit mii veadjá leat mannan boastut ja manne. Divššohasas ja oapmahaččain lea maiddái vuoigatvuohta diehtit maid dearvvasvuođadoaibma dahká vai nuppe háve ii nie geava.

Dearvvasvuođa- ja fuollabálvalusa buot bearráigeahču ulbmilin lea váikkuhit ahte dearvvasvuođa- ja fuollabálvalusa kvalitehta ja divššohassihkkarvuohta buoriduvvojit. Min bargun lea vuosttažettiin boahtte divššohassii lasihit sihkkarvuođa. Dalle lea beaktileamos giddet fuomášumi dilálašvuođaide maid jođihangoddi sáhttá ja ferte nuppástuhttit vai geahpedivččii hárálaš dearvvasvuođabálvalusvára.

Dearvvasvuođa- ja fuollabálvalusa fágabirrasat leat raportii dehálaš ulbmiljoavkkut. Stáhta dearvvasvuođabearráigeahčču dáhttu dan váikkuhit doaimmaid buoridanbarggus smiehttat ja digaštallat divššohassihkkarvuođa, riskastivrema ja oapmahašfátmmasteami birra.