Čoahkkáigeassu guovtti riikkaviidosaš bearráigeahču gávdnosiin 2017-2018:s bálvalusain olbmuide geain leat psykalaš váttut ja gárrendilleváttisvuođat oktanaga – dahje vejolaš gárrendilleváttisvuohta oktanaga

Stáhta dearvvašvuođabearráigeahčču čađahii guokte riikaviidosaš bearráigeahču dákkár bálvalusain 2017:s ja 2018:s. Buot fylkkamánnit galge čađahit bearráigeahčuid ja dat galge siskkildit sihke spesialistadearvvašvuođabálvalusaid, suohkanlaš dearvvašvuođa- ja fuollabálvalusaid ja sosiála bálvalusaid. Suohkaniid ja spesialistadearvvašvuođabálvalusaid ovttasdoaibman ii gullan dasa. Dán raporttas lea čoahkkáigeassu das ja ovdanbuktit daid deháleamos gávdnosiid.

Fylkkamánnit gávdne boasttuvuođaid ja váilevašvuođaid guovtti goalmmádasoasis suohkaniin ja gávccinuppelohkái guoktelogi guovllupsykiátralaš poliklinihkain mat ledje guorahallon.

Gávdnosat mat dávjá namuhuvvo bearráigeahčuin lei pasieanttaid ja geavaheddjiid váilevaš kárten ja čielggadeapmi, ja váilevaš ortnet mas leat eahpesávahahtti variašuvnnat bálvalusfálaldagain ja čuovvoleamis. Nubbi váilevaš suorgi mii guoskkai goappašiid bálvalusdásiide, lei ahte ii lean čielga doaibma- ja ovddasvástádusjuohkin bálvalusaid siskkobealde dahje iešguđetge osiin bálvalusain.

Ollu geavaheddjiin ja pasieanttain lea dahkamuš goappašiid bálvalusdásiin. Sidjiide geat ožžot bálvalusaid ja vejolaččat oapmahaččaide, ii galgga biddjot ovddasvástádus koordineret bálvalusaid ja fuolahit ahte iešguđetge váttisvuođat árvvoštallojit oktan.

Gávdnosat čájehit duođalaš váilevašvuođaid stivremis ja jođiheamis sihke suohkaniin ja dearvvašvuođadoaimmain.

Jođiheapmi ii lean sihkkarastán kvalitatiivalaš doarvái buori bálvalusfálaldagaid buot geavaheddjiide ja pasieanttaide.

Fylkkamánni čuovvula buot doaimmaid main leat gávdnan váilevašvuođaid.