Lea jođiheamis sáhka

Stáhta dearvvašvuođageahču gohččuma vuođul čađahedje stáhtahálddašeaddjit 2020–2021:s riikkaviidosaš geahču mánáidsuodjalusa barggus iskkademiiguin. Bearráigeahčut dahkkojuvvojedje systemarevišuvnnaiguin ja iešárvvoštallamiiguin. Oktiibuot iskojuvvojedje bargovuogit 90 mánáidsuodjalusbálvalusas. Konkluderejuvvui ahte lei láhkarihkkon dahje buoridanmunni 80:s dáin.

Lea čađamanni gávnnus ahte mánáidsuodjalusbálvalus ii daga doarvái buori barggu iskkademiid oktavuođas. Lea sáhka váilevuođain fágalaš barggus ja váilevaš árvvoštallamat daid dieđuin mat bohtet ovdan. Máŋga iskkadeami čađahuvvojit standárdamálle vuođul, almmá ahte árvvoštallo konkrehta mii lea heivvolaš fáddá suokkardallat dárkileabbo ja makkár dieđuid lea guovdil viežžat geas.

Leat máŋga mánáidsuodjalusbálvalusa mat addet mánáide menddo unnán dieđuid, dat dagaha ahte mánát eai sáhte gávnnahit makkár oaivilat sis leat. Ja de leat maid máŋga dilálašvuođa main mánáid oaivil ii boađe ovdan ja sii eai beasa muitalit maid oaivvildit. Go mánát leat ovdanbuktán iežaset áddejumi áššis, de dát eai álo boađe ovdan ášši ovdanbuktimis dahje árvvoštallamis das mii mánnái lea buoremussan.

Leat maiddái máŋga iskkadeami main ii leat dat ovddosmannan mii galggašii leat ášši duođalašvuođa hárrái. Máŋgga mánáidsuodjalusbálvalusas leat áigemearit nu guovddážis, ahte dát muhtin dilálašvuođain heađušta sin dahkamis doarvái dárkilis iskkademiid.

Máŋgga bearráigeahčus cuiggoduvvui ahte mánáidsuodjalusbálvalusas lei váilevaš áššemeannudeapmi ja hálddašanipmárdus. Oppalaččat lea maiddá váilevaš dokumentašuvdna fágalaš árvvoštallamiin ja ákkastallamin doaimmain ja konklušuvnnain iskkademiin.

Ahte dákkár praksis bálle ovdánahttot ja seailut, lea eanaš dan duohken ahte jođiheddjiin ii leat dárbbašlaš oppalašgeahčastat ja ahte eai čuovvulahte boasttuvuođaid maid dahkkojuvvojit. Iskkademiid barggu kvaliteahtta lea dalle ovttaskas áššemeannudeaddji duohken, iige oppalaččat mánáidsuodjalusbálvalusa duohken.