Váttis fástadoavtterdilálašvuođas leat váikkuhusat pasieanttaide – geahččovásáhusaid geahčadeapmi

Fástadoavtterortnet lea guhkit áiggi leamaš garra deaddaga vuolde, ja Dearvvašvuođadirektoráhtta čilge ahte lea duođalaš dilli. 2022 1. kvartálas ledje 153 000 olbmo Norggas listtus fásta doaktára haga. Sis lea riekti fástadoaktárii, vuoigatvuohta mii duohtavuođas ii ollašuhtto. Dearvvašvuođabearráigeahčču árvvoštallá dán duođalažžan.

Dearvvašvuođabearráigeahčču mearridii, maŋŋá lávga gulahallama stáhtahálddašeddjiin ovdáneami birra maŋimuš áiggi, guorahallat varas geahččovásáhusaid dábálašdoavtterbálvalusain ja doavttirfávttain gielddain.  Mis lea maid leamaš čoahkkin Dearvvašvuođabearráigeahču geavaheaddjiráđiin oažžun dihte oaiviliid pasieanta-, geavaheaddji-, ja oapmahašorganisašuvnnain.

Čohkkejuvvon čájeha geahčadeapmi ahte fástadoavtterortnet lea deaddaga vuolde miehtá riikka. Gielddaid návccat ja vejolašvuođat addit dohkálaš dábálašdoavtterbálvalusaid leat jo fanahuvvon.

Dearvvašvuođabearráigeahčču lea erenoamážit fuolastuvvan pasieanttaid hárrái geat jo leat hearkkes dilis, sis geain leat máŋggadáfot dearvvašvuođaváttisvuođat ja dárbbašit jámma čuovvuleami fástadoaktáris. Vuoras multibuohcci pasieanttat geain ii leat stáđis fástadoavttergaskavuohta, maŋŋonan diagnosabidjan borasdávdda oktavuođas ja váilevaš čuovvuleapmi olbmuin geain lea duođalaš dávda maŋŋágo leat ožžon divššu spesialistadearvvašvuođabálvalusas leat ovdamearkkat váilevašvuođain dearvvašvuođaveahkis mii jo lea addon. Maŋŋá divššu spesialistadearvvašvuođabálvalusas, dahje maŋŋá go lea leamaš oktavuohta doavtterfávttain lea dábálaččat fástadoavttir guhte čuovvulahttá pasieantta go dasa lea dárbu. Materiálain leat máŋga čilgehusa hástalusain mat leat čadnon dán čuovvuleapmái, erenoamážit go pasieanttat leat listtus mas ii leat fásta doavttir. Dearvvašvuođabearráigeahču árvvoštallama vuođul lea dát riska mii dáhpáhuvvá dál, ja dáinna ovdánemiin maid oaidnit, lea sivva jáhkkit ahte vástideaddji váilevašvuođat fas dáhpáhuvvet.