1. Čoahkkáigeassu

Dát raporta lea oassin min viidáset barggu vuođus harmoniseret ja buoridit Stáhtahálddašeddjiid áššemeannudeami kvalitehta go bearráigehččet bággema ja fámu geavaheami.   

Raporttas čilget mii fuomášumiid mat gusket stáhtahálddašeaddji rollii bearráigeahččanorgánan bággema ja fámu geavaheami oktavuođas olbmuid guovdu geain leat psyhkalaš ovdánanvádjitvuođat. Raporta čujuha iešguđetlágan hástalusaide stáhtahálddašeddjiid barggus dearvvašvuođa- ja fuolahusbálvaluslága 9. kapihttala mearrádusaid bearráigeahččamiin. Bargu lea oassi prošeavttas 'bággen ja fápmu', maid Stáhta Dearvvašvuođabearráigeahčču (Statens helsetilsyn) álggahii 2023:s Prošeavtta ulbmil lea buoridit bearráigeahču ja baggema áššemeannudeami kvalitehta olbmuid guovdu geain leat ovdánanvádjitvuođat.

Mii leat geahčadan stáhtahálddašeddjiid bargovugiid go bearráigehččet bággen- ja fápmomearrádusaid, ja geahčadan mo dát bargu vel eambbo sáhttá buoridit ovdánanvádjigis olbmuid riektesihkkarvuođa. Raporttas buktit mii buoridanávžžuhusaid ja evttohit ođasmahttit njuolggadusa "Fylkkamánni barggut dearvvašvuođa- ja fuolahusbálvaluslága 9. kapihttala vuođul". Viidáseappot ávžžuhit mii earret eará joatkit jeavddalaš bággema ja fámu fágalaš forumiid Stáhtahálddašeddjiid áššemeannudeddjiide, jahkásaš fáddákurssaiguin, čohkket ávkkálaš dieđuid Losen intraneahtas ja ráhkadit oktasaš mearrádusmálle mearrádusaid bearráigehččui.

Geahčadeapmi čájeha stuora erohusaid stáhtahálddašeddjiid áššemeannudeamis ja mii fertet boahtte áiggis čuovvolit dan maid mii defineret sávakeahtes erohussan. Raporttas mii maid deattuhit man deaŧalaš lea sihkkarastit doarvái resurssaid stáhtahálddašeddjiid bargui bearráigeahččat mearrádusaid.