Varetaking av grunnleggande behov hos eldre som bur heime

Statsforvaltaren skal i 2025 og i 2026 undersøke om kommunane varetek grunnleggande behov til heimebuande eldre. Tilsynet rettar seg mot heimebuande over 75 som har langvarige behov for helsehjelp i heimen. Varetaking av det grunnleggande behovet til eldre for helsehjelp skjer gjennom ein heilskapleg og systematisk helsefagleg prosess. Tilsynet vil derfor undersøke om og korleis kommunen:

• kartlegg pasienten
• vurderer og formar ut mål og tiltak
• set i verk tiltak
• fangar opp endring i helsetilstanden til pasienten, og følger opp endringane med nødvendige tiltak
• brukarmedverknad inngår som ein del av undersøkinga for alle områda. Dette gjeld også krav til styring og kvalitetsforbetringsarbeid.

Avgrensinga til heimebuande over 75 år med langvarig behov for helse- og omsorgstenester er valt ut frå kunnskap om at denne gruppa eldre ofte har auka risiko for underernæring, fall, einsemd, tap av kontakt med helsetenesta, nedsett fysisk og kognitiv funksjonsevne. Dette er forhold som kan redusere evna til eigenomsorg hos den enkelte, som dermed kan ha behov for tilpassa helsehjelp for å dekke grunnleggande behov som personleg hygiene, ernæring, flytting, medisinsk oppfølging med vidare.

Tilsynserfaringar viser at tenester til eldre kan svikte, og at desse tenestene er under press. Talet på eldre vil auke kraftig i åra som kjem. Eldre menneske kan ha redusert fysisk kapasitet og auka sårbarheit for helseproblem. Dei kan ha redusert evne til eigenomsorg og mange har behov for bistand til å få dekt dei grunnleggande behova sine.

Samtidig yter heimetenesta ei rekke ulike tenester, og omfattar fleire og meir avanserte oppgåver enn tidlegare. Utfordringsbiletet er prega av auka etterspurnad av tenester som legg press på ressursane, bemanningsutfordringar og mangel på kvalifisert helsepersonell, og behov for spesialisert kunnskap og koordinering mellom helsetenestene på grunn av kompleksiteten i pleiebehovet.

Det er avgrensa med kunnskap om praksis og kvalitet i dei heimebaserte tenestene. Det har vore få landsomfattande tilsyn med heimetenester til eldre. Helsetilsynet vil med dette tilsynet, og tilsynssatsing eldre, bidra til å at heimebuande eldre får vareteke grunnleggande behov for helsehjelp og dessutan bidra med kunnskap om praksis i tenestene.